[Gainbegiratu] Baldintzen aurkezpena eta azken balorazioa

Zertarako

Prozesuan zehar landutako zortzi baldintzei buruzko iritzia jasotzea, bai edukiari dagokionez bai prozesuaren bizipenari dagokionez, ETEko eta Kontraste Taldeetako kideen artean.

Nola landu dugu

Parte-hartzaileek fitxa banatan jaso zituzten beren ekarpenak, bi atal bereizitan: batetik, baldintzen edukiari eta baldintzei buruzko iritzia; bestetik, prozesuaren bizipenari buruzko azken balorazioa. ETE taldeko kideek zein Kontraste Taldeetako kideek parte hartu zuten (hezkuntza, gazteak/kirola/aisia, lan mundua, euskaraz ez dakitenak eta kulturgintza arloetatik).

Zer atera da

Baldintzen balorazio orokorra. Baldintzak positibotzat, egokitzat eta koherentetzat jo ziren orokorrean. Etekintzat, aberatstzat, beharrezkotzat eta osotutzat ere baloratu ziren. Helburuak "anbiziosoak eta aldi berean behar-beharrezkoak" direla nabarmendu zen.

Gauzagarritasunari buruzko zalantza. Ildo kritiko nagusia izan zen. Baldintzak asko eta orokorregiak ote diren galdetu zen, eta hiru galdera zehatz formulatu ziren: gauzatu daitezke?, zeintzuk dira lehentasunak?, eta nola bideratu behar dira? Baldintza batzuk besteak baino errazagoak direla seinalatu zen (2.a adibidez errazagoa, 4.a zailagoa). Denbora gutxi eta baldintza gehiegi daudela ere aipatu zen, eta baldintzak desglosatzeko/banakatzeko beharra behin baino gehiagotan azpimarratu zen.

Baldintzen arteko hierarkia. Ekarpen batek mendekotasun-harremana proposatu zuen baldintzen artean: hizkuntza eta kultura anitzeko pertsonen ezagutza (1. baldintza) gainerako baldintzak betetzeko aurrebaldintza dela adierazi zen, baita etorkinekiko ikuspegiaren aldaketa (5. baldintza) ere, segregazioari aurre egiteko ezinbestekotzat jota.

Baldintzen osotasuna. Zortzi baldintza hauek beharrezkoak direla baina ez nahikoak izan adierazi zen; beste baldintza batzuk falta direla seinalatu zen. Era berean, euskararekin zuzeneko loturarik ez duten baldintzak ere definitu beharko liratekeela nabarmendu zen, herria euskaldunagoa izatea nahi bada.

Zehaztu beharreko kontzeptuak. "Euskal identitate irekia" aipatzean, identitate anitzez ari ote garen zehaztu beharko litzatekeela planteatu zen.

Erantzukizuna. Entitate bakoitzaren ardura zein den adostu beharra nabarmendu zen, ezinbesteko baldintza gisa. Aldaketa kolektiboak gertatzeko aldaketa pertsonalak ere kontuan hartu behar direla gogorarazi zen: "Prest al gaude?".

Erakundeen papera. Etorkizuneko Herri Itunean erakundeek oldarraldiaren aurrean egin dezaketena kontuan izan behar dela seinalatu zen.

Balioetsi diren edukiak. Gune seguruak, jarrera harkorra, euskara ikasteko aukera desberdinak eta harrera irekia izan ziren gehien azpimarratutako puntuak. Euskara sentimendu eta emozioekin lotzeko beharra ere behin baino gehiagotan agertu zen, baita herriak izan behar duen kontzientzia mailari eta loturari buruzko aipamenak ere.

Prozesuaren beraren balorazioa. Metodologia positiboki baloratu zen, besteren iritziak entzuteko aukera gisa. Partaidetzaren aniztasuna eta herritar askoren inplikazioa positiboki jaso ziren. Prozesua ez zela amaitu, orain hasi zela, behin eta berriz errepikatu zen ideia izan zen, eta zerbait "piztu" dela adierazi zen.

Zer geratu da irekita

• Lehentasunak ezartzeko irizpidea: zortzi baldintzetatik zeintzuk lehenetsi eta zergatik.

• Entitate bakoitzaren ardura zehaztea.

• Epeak, helburuak eta adierazleak finkatzea, baldintzak lorgarriak izan daitezen.

• Haur eta nerabeen ahotsa jasotzeko modua: prozesua helduen begiradatik egin dela seinalatu zen, eta etorkizuneko herritarrak ere entzutea interesgarria litzatekeela.

• Euskararekiko jarrera hain positiboa ez dutenengana nola iritsi.

• Partaidetzaren profila: bertaratutakoen artean aurpegi ezagunak izan zirela ohartarazi zen.

• Euskara ikasi nahi dutenentzat nora jo jakiteko zailtasuna, bai kanpotik datorren jendearentzat bai bertan jaiotakoentzat.

Zer eramaten dugu hurrengora

Baldintzak abiapuntu gisa hartzea, ez helmuga gisa. Hurrengo faseak hiru gauza zehaztu beharko ditu: nork zer ardura hartzen duen, zer epetan, eta zerekin neurtuko den. Prozesuaren gakoa herritarren proiektua izatea lortzea da, eragile guztiak koordinatuz.